Kategorisasyon

Ang una nakong plano sa paghatag og kategorisasyon sa mga pakatawa nga inyong makit-an dinhi binase sa mga gihisgotan sa pakatawa. Pananglitan, ang “Nalibang ra gyod” anha unta mabutang sulod sa “Propesyonal” (kay may kalabotan niini ang usa ka propesyonal–ang abogado). Apan human ko makabutang og 140 ka mga gitikgitik, akong namatngonan nga ang maong paagi lisod iimplementar sa dayon ug sa kadugayan di diay kaayo makatabang sa mga magbabasa.

Busa ang bag-ong kategorisasyon karon binase lamang sa unsa ka bastos ang usa ka pakatawa:

• Ang mga pakatawa nga naa mahimutang sa kategoriyang “Dili Bastos” mahimo nimong ipaambit sa uban, bisan sa dili nimo kaila ug wala nimo mahibaw-i ang preperensiya sa mga pakatawa.
• Ang mga pakatawa nga naa mahimutang sa kategoriyang “Medyo Bastos” mahimong makapainsulto sa pipila ug dili tan-awong kataw-anan sa uban. Pag-amping ning maong mga pakatawa.
• Ang mga pakatawa nga naa mahimutang sa kategoriyang “Bastos” komon nga mga pakatawa sa Kabisay-an ug sa Internet, ug nagtuki sa pakighilawas. Kining maong mga pakatawa puydeng saw-an sa managhigala, gawas kon dunay bisan usa lamang sa ila nga dili ganahan sa maong klase sa mga pakatawa.
• Ang mga pakatawa nga naa mahimutang sa kategoriyang “Super Bastos” opensibo sa daghang mga tawo. Sagad sa mga pakatawang anaa sa “Super Bastos” nahulog usab sa “Bastos” apan tungod kay nagtuki sa mga tawong sagrado (madre ug pari) gibutang sa laing kategoriya.