Opensibong mga pakatawa

Una sa tanan, buot akong magpasalamat sa mga tawo nga mikomentaryo sa pagkalakip sa mga pakatawa dinhi nga opensibo ug bastos. Pasabot lang kana nga may nagbasahan diay niining akong gamayng proyekto. Salamat kaayo!

Usa sa akong nabantayan dihang gisugdan ko kining proyektoha mao ang pagkadaghan sa mga Binisayang gitikgitik nga ang mga alusyon nga sekswal ang gihimong basehan sa pagpakatawa. Gani, sa unang mga adlaw ning maong proyekto (dihang lahi pa nga kategorisasyon ang akong gigamit), ang kategoriyang “Bastos” ang labing daghang sulod ug mao usay labing gibisita sa mga magbabasa. Tingali maingon usab nato nga ang kalamposan niining maong proyekto sa una niyang mga adlaw tungod sa pagbisita niadtong nangita sa maong mga klase sa pakatawa, ug ang pagpasa nila sa adres sa balayan ngadto sa uban mao ang hinungdang nakatag ang kahibalo bahin niini.

Sa una pa mang mga adlaw sa proyekto akong giila ang panginahanglang mabuwag gikan sa kadaghanan sa mga pakatawa ang mga pakatawang binastos. Mao man gani nga may kategoriyang “Bastos” niadtong ang ubang kategoriya “Panambal”, “Tulunghaan”, ubp pa.

Wala koy intensiyon nga isabwag kining maong mga bastos nga pakatawa. Apan dili ko usab intensiyon nga kompletong wad-on sila ning balayan. Ang akong gidawat nga hagit baya sa pagsugod ning maong proyekto mao ang paghimo sa labing komprehensibong balayan sa Internet diin makita ang mga pakatawang Binisaya. Sa orihinal pa bitaw nga bersiyon sa akong “Kabahin ini” nga panid: “Di gyod nako sala kon bastoson ang mga Bisaya. Basta nagdokumento ra ko og unsay akong nadungog ug nakita.” Dili ikalimod nga ang mga sekswal ug bugal-bugal nga pakatawa lakip ug kabahin sa mga pakatawang Binisaya. Ug kon manghambog kong kining maong balayan ang labing komprehensibong koleksiyon sa mga pakatawang Bisaya, angay lamang nga malakip kadtong maong mga pakatawa. Unta dili ko ninyo pakasad-on sa unsa may nakita ninyong sayop sa katilingban, kay ang akong unang tumong mao ang pagmugna og komprehensibong koleksiyon sa mga pakatawang Bisaya, bastos man o tinarong, ug kining maong proyekto repleksiyon lamang sa unsa may gipasa-pasang pakatawa.

Kon buot mo, makatabang ka sa pagpagamay sa porsiyento sa mga pakatawa dinhi nga makategoriyang “Bastos” ug “Super Bastos”. Unsaon? Ipadala lamang kanako (islesv[at]gmail[dot]com) ang imong mga Binisaya nga pakatawa nga tarong ug limpiyo. Unsaon man pong ang mga magpadala nakog mga pakatawa kato man pong bastos maoy ipadala